ရိုးသားဖြူစင်တဲ့ ကျေးလက်သဘာဝကိုအရောင်ဆိုးခြင်း
သို့
လေးစားအပ်ပါသော သမ္မတကြီးခင်ဗျာ--
ရခိုင်ပြည်နယ်၊ စစ်တွေမြောက်ပိုင်း၊ ပုဏားကျွန်းမြို့နယ်၊ ယိုးချောင်းမြစ်ကမ်းနံဘေး၊ ထိုရွာလေး၏ အနောက်ဘက်တွင် စစ်တွေ-ရန်ကုန်ကားလမ်း၊ ရထားလမ်းကြား၊ ယိုးတရုတ်ကျေးရွာအုပ်စုနှင့် ၃ မိုင်ခန့်အကွာတွင် ရိုးသားစွာလုပ်ကိုင်စားသောက်နေကြသော ကျေးရွာကလေးသည် ယခုအခါတွင် ကျေးလက်နေ ရွာသူ၊ ရွာသားများ၊ လယ်သမားများ လွတ်လပ်စွာလုပ်ကိုင်စားသောက်ခွင့် ခက်ခဲမှုများစွာနှင့်ကြုံတွေ့နေရပြီး အခုတော့ အဖြူရောင် ရွာလေးကို အနက်ရောင်လွှမ်းခြုံသွားခဲ့ပါပြီ။
ထိုရွာကလေးကား သဲတော်ဆိုတဲ့ ရွာကလေးပင်ဖြစ်ပေသည်။ အိမ်ခြေ ၂၀၀ နီးပါးခန့်ရှိပြီး အဓိကလယ်မြေ၊ ကိုင်းကျွန်း၊ ဥယျာဉ်ခြံများကို အမှီပြုပြီး လုပ်ကိုင်စားသောက်နေကြသော ကျေးလက်ရွာကလေးပင်ဖြစ်သည်။ ထိုရွာ၏ အနောက်ဘက်တောင်ကုန်းပေါ်တွင် သမိုင်းဝင် နားသီးတော်ဓာတ်စေတီတစ်ဆူတည်ထားပြီး စေတီတော် တည်ရှိရာနှင့် ရထား၊ ကားလမ်းကြားတွင် တစ်ချိန်က ဘိုးဘွားပိုင်ကိုင်းများတွင် တစ်ပိုင်တစ်နိုင် ဥယျာဉ်ခြုံများရှိပြီး မြေလွတ်ကိုင်းများတွင်လည်း ကျွဲ၊ နွားများ စားကျက်ကိုင်းတောအဖြစ် အသုံးပြုထားသောနေရာဖြစ်ပါသည်။
တစ်ချိန်က ဥယျာဉ်ခြံမြေနှင့် စားကျက်ကိုင်းတောများ
ထိုရွာလေး၏ဓလေ့သည် တစ်ချိန်က လယ်သမားတိုင်း မိမိကိုယ်ပိုင်စားကျက်မြေများရှိသော်လည်း ယခင် နယကအစိုးရလက်ထက်တွင် လယ်သမားတိုင်း မြေလွတ်မြေရိုင်းမကျန် စပါးစိုက်ပျိုးရမည်ဆိုသည့် မူဝါဒနှင့်အညီ ထိုစားကျက်မြေများလည်း နေ့ချင်းညချင်းကွယ်ပျောက်သွားခဲ့ပြီး တစ်ချို့စားချက်မြေများကိုတောင် ရွာမှဥက္ကဌနှင့် ညှိပြီး နယ်မြေခံတပ်ရင်းများ အပိုင်သိမ်းကာ စပါးစိုက်ပျိုးခြင်း၊ သီးစားချထားခြင်း၊ မိမိကိုယ်ကျိုးအတွက် အခုထက်ထိ အသုံးပြုနေဆဲဖြစ်ပါသည်။
ရွာပိုင်စားကျက်မြေကွက်များ
လယ်မြေများထွန်ယက်ပြီး မိမိကျွဲ၊ နွားများကို ကိုယ်ပိုင်စားကျက်မြေများတွင် လွှတ်ကျောင်းစနစ်ဖြင့် အသုံးပြုသော်လည်း စားကျက်မြေများကို မြန်မာနိုင်ငံတစ်ဝှမ်း မည်သည့်မြေယာမဆို အစိုးရကပိုင်သည်ဆိုသည့် မူကို လက်ကိုင်ထားသော အာဏာပိုင်အဖွဲ့အစည်း၊ နယ်မြေခံတပ်ရင်းများ၊ ဌာနဆိုင်ရာများက သိမ်းယူလိုက်သော အခါ စားကျက်မြေများပျောက်ကွယ်သွားပြီး တောစပ်ကိုင်းတောများတွင် လွှတ်ကျောင်းစနစ်ဖြင့် တစ်ဆင့်အသုံးပြု ကြရပါသည်။
ယခုအခါအဆိုပါနေရာများတွင် နယ်မြေခံဒေသကွပ်ကဲမှုစစ်ဌာနချုပ်၊ အကျဉ်းဦးစီးဌာများမှ ရာဘာစိုက်ပျိုး ထားပြီး ရိုးသားစွာလုပ်ကိုင်စားသောက်နေရာ ရွာသားများ အတိဒုက္ခများစွာနှင့် ကြုံတွေ့နေကြရပါသည်။
ဒေသကွပ်ကဲမှုဌာနချုပ်မှ ရာဘာတောများ
အထူးသဖြင့် စစ်တွေအကျဉ်းထောင်မှ ထောင်သားအချို့အား ၄င်းသဲတော်ရွာလေးနှင့် ၄ ဖာလုံခန့်အကွာ တွင် ရဲဘက်အကျဉ်းစခန်းပုံစံမျိုးပြုလုပ်ထားပြီး ထိုရွာ၏ ကျွဲ၊ နွား စားကျက်ကိုင်းမြေများကိုသိမ်းယူထားပါသည်။ အကျဉ်းသား ၂၅ ဦးခန့်ရှိပြီး ထိုအကျဉ်းသားများအား ထောင်မှူး၊ ထိုဌာနများမှဝန်ထမ်းများ မိမိတို့ကိုယ်ကျိုးအတွက် အုတ်ဖုတ်ရန်သစ်များထုတ်ခိုင်းခြင်း၊ ရန်ကုန်-စစ်တွေကားလမ်းဘေး မြေလွတ်များတွင် စိုက်ပျိုးခင်းများပြုလုပ်ခြင်း၊ ရာဘာတောရှင်းလင်းစေခိုင်ခြင်း စသည့်များစေခိုင်းပြုလုပ်နေသည်ကို ခရီးသွားပြည်သူတိုင်း မျက်ဝါးထင်ထင်မြင် တွေ့ရပါသည်။ အကျဉ်းစခန်းဆိုရုံသာရှိပြီး ဓနိမိုး၊ ၀ါးထရံကာ အဆောက်အဥ ၃ လုံးခန်းသာရှိသည်ကို တွေ့ရှိရပါ သည်။ ၄င်းအကျဉ်းသားထဲတွင် ထောင်မှူးအား ငွေပေးနိုင်သူတစ်ချို့က ထိုကျေးရွာအနီးအနားတွင်ပင် ကိုယ်ပိုင်စီး ပွားရေးလုပ်ကိုင်ခြင်း၊ တစ်ချို့ဆိုလျင် ၄င်းအကျဉ်းစခန်းမှာတောင် မအိမ်/မစားဘဲ မိသားစုကိုခေါ်ပြီး ထိုကျေးရွာတွင်ပင် အိမ်ငှားပြီး နေထိုင်လို့ရတဲ့အဆင့်ထိ စနစ်တကျယိုယွင်းပျက်စီး၊ လာဘ်စားမှုများကို ကိုယ်တွေ့ ကြုံခဲ့ရပါသည်။
အမည်ကဖြင့် အကျဉ်းသားတဲ့၊ ရွာထဲဝင်ပြီး အရက်သောက်၊ ရွာကမိန့်ကလေးများတွေ့ရင် မထိတထိ၊ ရစ်သီရစ်သီဖြင့် ကြုံတွေ့ရယူအဖို့ ရင်တမမဖြစ်ခဲ့ရပေသည်။ ယခုလိုစပါးစိုက်ပျိုးပြီးချိန်တွင် ယခင်စားနေကြ စားကျက်ကိုင်းတောမြေများတွင် ကျွဲ၊ နွားများဝင်ရောက်စားနေကြသဖြင့် အကျဉ်းစခန်းမှ ထိုကျွဲ၊ နွားများအားဖမ်းဆီး ကာ တစ်ကောင်လျင် ၅၀၀၀ိ/- ပေးဆောင်ရပြီးမှ မိမိကျွဲ၊ နွားများကို ၄င်းတို့ထံမှ ယူခွင့်ရပေသည်။ ငွေ ၅၀၀၀/-မပေးနိုင်လျင် နွားချေး(၃)အိတ်ပေးဆောင်ရပေသည်။ အခုလို အကျဉ်းဦးစီးဌာနမှ ရွာသားများအား နိုင်ထက်စီးနင်း ပြုလုပ်ခြင်း၊ အာဏာကိုအလွဲသုံးစားပြုလုပ်ခြင်း၊ ရွာသားများ များစွာဒုက္ခရောက်နေကြရသည်ကို နိုင်ငံတော်သမ္မတ သိရှိအောင် တင်ပြခြင်းဖြစ်ပါသည်။
အထူးသဖြင့် ၄င်းကျေးရွာ(နာမည်ကိုမဖော်ပြလိုတော့ပါ)လယ်သမားတစ်ဦးတွင် ပထမ ခိုင်းနွားတစ်ကောင် ပျောက်ဆုံးသွားပါသည်။ လယ်ပိုင်ရှင်က သူခိုးများ ခိုးသွားလေသလားဆိုပြီး လိုက်လံစုံစမ်းသေးသော်လည်း လမ်းစ ရှာမတွေ့ခဲ့ပါ။ နောက် လယ်ပိုင်ရှင်တစ်ဦးထံမှလည်း အလားတူပင် ခိုင်းနွားတစ်ကောင်ပျောက်ဆုံးသွားပါသည်။ သို့ရာတွင်လည်း ပူဆွေးသောကနှင့်အတူ ယနေ့တိုင်ခံစားနေရဆဲပါ။ ထပ်မံပြီး ခိုင်းနွားတစ်ကောင်ပျောက်ဆုံးရာ တွင် ထိုအကျဉ်းစခန်းအနီးတောထဲတွင် အမှတ်မထင်ဘဲ အကျဉ်းသားများဝိုင်းဖွဲ့ပြီး ထိုနွားကို(ဖော်)နေသည်ကို ရွာသားတစ်ချို့မျက်ဝါးထင်ထင်တွေ့မြင်ရပါသည်။ စုံစမ်းကြည့်လိုက်သည့်အခါ အထက်ပါပျောက်ဆုံးသွားသောနွား များကိုလည်း(ဖော်)ပြီး ၄င်းတို့ရိက္ခာအတွက်၊ ပိုလျှံသောအသားများကို တစ်ဘက်ရွာများသို့ သွားရောက်ရောင်းစား နေသည်ကို စုံစမ်းသိရှိရပါသည်။ ထိုကိစ္စကို စစ်တွေအကျဉ်းဦးစီးဌာနမှသိသောအခါ နွားပိုင်ရှင်ကိုလည်း လျော်ကျေး မပေး၊ ပြစ်မှုကျူးလွန်သောအကျဉ်းသား၊ ထောင်မှူး၊ ထောင်ဝန်ထမ်းများကိုလည်း အရေးမယူဘဲ တစ်ခြားအကျဉ်း စခန်းသို့ ပြောင်းရွှေ့စေခဲ့ပါသည်။
သမ္မတကြီးခင်ဗျား..
ထောင်မှူးနှင့်တကွ အကျဉ်းသားများပူးပေါင်းပြီး ရိုးသားဖြူစင်တဲ့ ရွာကလေး၏ သဘာဝအလှတရားတွေကို အခုတော့ အရောင်တွေစွမ်းထင်နေပါပြီ။ ထိုရွာရဲ့ လူတွေက နိုင်ငံရေး၊ ဥပဒေတွေကို သိပ်ပြီးနားလည်တဲ့လူတွေ လည်း မဟုတ်ပါ။ တစ်နေ့စာတစ်နေ့ ရှာစား၊ လယ်မြေကိုင်းကျွန်းကထွက်တဲ့ မပြောပြလောက်တဲ့ဝမ်းစာလေးနဲ့ မိသားစုဘ၀ကို ရုန်းကန်လှုပ်ရှားနေတဲ့ ရွာကလေးပါ။
အကျဉ်းစခန်းနဲ့ ၄ ဖာလုံသာဝေးကွာပြီး ထိုရွာနဲ့ အလွန်နီးကပ်စွာတည်ရှိခြင်း၊ အကျဉ်းသားများကို အကျဉ်းသားနှင့်မတူအောင် လွတ်လပ်မှုများပေးထားခြင်း၊ တောတောင်များတွင် ပျော်ပွဲစားထွက်လာတဲ့ အဖွဲ့နှင့်တူ နေခြင်း၊ အကျဉ်းသားများ တစ်ချိန်ချိန်တွင် အုပ်ချုပ်မှုဖြစ်စဉ်များ၊ မှုခင်းဖြစ်စဉ်များ ထပ်မံဖြစ်ပွားလာနိုင်ခြင်း၊ ထိုရွာ သားများသည် အထက်ပါဆိုခဲ့သည့်အတိုင်း ဥပဒေကိုအတွင်းကျကျ သိရှိနားလည်မှုအားနည်းခြင်းကြောင့် တစ်ချိန် တွင် မိမိတို့၏အကျိုးစီးပွား၊ ကျေးရွာဂုဏ်သိက္ခာများ ထိခိုက်လာလျှင် ရွာနှင့်အကျဉ်းစခန်း မလိုလားအပ်သော ဆူပူ မှုများဖြစ်ပွားလာနိုင်ပါသည်။ အပြောနှင့်မပြီးဆုံးစေချင်ပါ။ အလုပ်ဖြင့်သာသက်သေပြစေချင်ပါသည်။ လက်ရှိပကတိ အနေအထားကိုသိရှိအောင် တာဝန်ရှိသူများအနေဖြင့် ကွင်းဆင်းလေ့လာသင့်ပါသည်။
ဥယျာဉ်ခြံ၊ ကိုင်းတောများကိုသိမ်းယူပြီး အကျဉ်းစခန်းတည်ရှိသည့်နေရာနှင့် ရာဘာတောများ
နိုင်ငံတော်သမ္မတဦးဆောင်သော အစိုးရသစ်အနေဖြင့် စည်းကမ်းပြည့်ဝသော ဒီမိုကရေစီစနစ်ကိုကျင့်သုံး နေသောအချိန်တွင် အထက်တွင်မှန်ကန်သော မူဝါဒလမ်းစဉ်များချမှတ်အကောင်အထည်ဖော်နေသော်လည်း အောက်ခြေဌာနဆိုင်ရာအချို့တွင် အခုလို လူ့အခွင့်ရေးချိုးဖောက်မှုများ၊ ဥပဒေချို့ဖောက်မှုများ၊ လာဘ်စားမှုများ များစွာရှိနေကြောင်း သမ္မတနှင့်တကွ တာဝန်ရှိသူများသိရှိအောင် တင်ပြခြင်းဖြစ်ပါသည်။
ဒီမိုကရေစီစနစ်ဆိုသည်မှာ လူပုဂ္ဂိုလ်တစ်ဦးချင်းစီ၏ ဂုဏ်သိက္ခာနှင့်အခြေခံအခွင့်အရေးများကို ကာကွယ် မြှင့်တင်နိုင်သည့် ကျင့်စဉ်တစ်ရပ်ပင်ဖြစ်ပါသည်။ ကိုယ်ပိုင်စွမ်းရည်ဖြင့် ဝေဖန်ပိုင်းခြားမှုကို ဖော်ထုတ်ခွင့်ရှိသည့် တစ်ခုတည်းသော နိုင်ငံရေးစနစ်လည်းဖြစ်သောကြောင့် ကျေးရွာနေလူတန်းစားများ၏ လက်တွေ့ တွေ့ကြုံနေရတဲ့ ဒုက္ခတွေကို ရင်ဖွင့်ဖော်ထုတ်ခြင်းဖြစ်ပါသည်။
သမ္မတအနေဖြင့် ရိုးသားဖြူစင်တဲ့ ကျေးလက်နေတောသူတောင်သားတို့၏ လူနေမှုဘ၀မြင့်တင်ရာတွင် လည်း အောက်ခြေတွင် ယခုလိုအကျင့်ဆိုးများကို အမြစ်ပြတ်အရေးယူဆောင်ရွက်သင့်ကြောင်း တင်ပြခြင်းဖြစ် ပါသည်။
ပြည်သူတိုင်း၏ လိုလားတောင့်တချက်ဖြစ်သည့် နိုင်ငံတော်တည်ငြိမ်အေးချမ်းရေး၊ နိုင်ငံတော်ခေတ်မီဖွံ့ဖြိုး တိုးတက်ရေး၊ ပြည်သူတို့၏ လူမှုစီးပွားဘ၀ဖွံ့ဖြိုးတိုးတက်ရေး ဥပဒေနှင့်အညီလွတ်လပ်စွာနေထိုင်လုပ်ကိုင်စား သောက်ရေး၊ ပြည်သူတို့၏အနာဂတ်ဘ၀သာယာလှပရေးအတွက် တရားမျှတခြင်း၊ လွတ်လပ်ခြင်း၊ ညီမျှခြင်းတည်း ဟူသော လောကပါလတရားများထွန်းကားသည့် ခေတ်မီဖွံ့ဖြိုးတိုးတက်သော ဒီမိုကရေစီနိုင်ငံတော်ကြီးဖြစ်ထွန်းပေါ် ပေါက်လာစေရန် ကြိုးပမ်းဆောင်ရွက်နေချိန်တွင် တစ်ဘက်တွင်လည်း အောက်ခြေဌာနဆိုင်ရာတစ်ချို့ ကျေးလက်နေတောရွာများတွင် ခြစားမှုများစွာ ရှိနေသေးကြောင်း ပြည်သူတစ်ဦးအနေဖြင့် ရင်ဖွင့်လိုက်ရခြင်း ဖြစ်ပါသည်။
0 comments:
Post a Comment